2Cor 4 | WSK | STEP | Kaem gomang nangaram ale ura imi nangaram. Buta se ura mu betenakko me nasokel kueso.

2 Corinthians 4

Apostle alo den gilalong yawara ko ura Kristus ko sokel te la bitakasan

1 Kaem gomang nangaram ale ura imi nangaram. Buta se ura mu betenakko me nasokel kueso. 2 Ana mu kilek kawel kari yumura te betesan mu te kariimet me nongomang kulukursan. Ale me nunga kulursan. Ale den kawel sang Kaem ko den ago me gurugusan balsan. Mena. Ana Kaem ko nguanga se ko den nunguning la wetang te balsan. Se kariimet anananga ura mu am wetang te la aringimon ale balmon den nunguning ma balmonko.

3 Den gilalong yawara ana balsan mu wetang te. Se kariimet ikisan bare wetang te iwita me ikisan, mu ko duap mu nuna sarenga namawasan ale. 4 Nuna me ko nongomang ningi nunguning aso. Mu awuk, ali ewere ko kaem Satan mu nunga ikia nongomang kaolam ^{▼▼2 Cor 4:4 Satan: Eph 2:2. Kaem balam nikim aratukko mam: Gen 1:3.}, se nuna den gilalong yawara ko nikim aringimonko me terong. Kristus mu Kaem tuartala, se den gilalong yawara mu noko nup biya, nikinang sokel ago ko balso. Bare nuna ko ikimonko me terong.

5 Ikialko. Ana nangata nanga dugu duap kariimet me nunga manorsan. Mena. Ana Jesus Kristus mu Kari Biya wore ko dugu duap balsan, ale ana nangata mu nenenga ura kari Jesus nup te barasukko wore. 6 Mu awuk, Kaem balam “Nikim biya tiromorom mu ningi tai kapurukko” mam, mu Kaem borta anananga nangamang ningi ko nikim beteram. Se nikim mu te ana Kaem ko sokel, ko marak, ko nikitang, ko kilek kilek suen biya Kristus koma motam te aringiman, ale ko ikiman.

7 Bare ana mu yam kani saramin iwita, se mel ningo nikim sokel ago ningi aniso, mu te kariimet ikimon, sokel biyala nunguningkiri umu mu ana nangata nanga mena, mu Kaem ko, ma balmonko. 8 Ana ikup suen biya arigisan, bare mu me nanga ira murso. Tom saki aguwaya manakko mu me ikisan, bare ana me mesan, am nangamang aora biya bagasan. 9 Nanga bita maguwusan, bare Kaem ana me nanga beteso. Nanga mosan se dagulasan, bare me kuera nunguning kuesan, barasasan am namawasan.

10 Jesus kumik te aratukaso iwitata, nuna tom suen biya memek nangarsan se kuera ko lage te aragasan. Bare kariimet te aringimonko mu, ana Jesus ko marak sokel te bagasan. 11 Ana Jesus ko nup ko, tom suen biya kariimet nanga momonko kaesan, bare ana am marak bagasan. Se mu te noko marak sokel nanga nangimik guang maga namurukko mu ningi aniso mu kariimet ko ikimonko. 12 Buta se ana tom suen biya kuera ko lage te aragasan, bare nina mu te marak yawara tasan.

13 Kaem ko batoga te den bo iwita aniso, “Ani angamang ningi nunguning aram, se ko balem.” Mu turantala, ana betelatala nangamang ningi nunguning aram se balsan. 14 Mu awuk, ana ikisan, Kaem Kari Biya Jesus kueram wore patowaram se aking barasam, mu kota tala ana Jesus ilak nanga patawuruk se barasanak se nengerak nanga giok ale ko koma dugu te nanga awurokko. 15 Buta se mel suen biya ana bita se ko ikup giwasan mu nina ninga sangukko. Se den gilalong yawara kariimet ningi biyala namuruk, mu nuna Kaem gomang nuna nungaram mu ko ninguru la amilmil tumon ale nup patawomonko.

16 Umutang ko ana nasokel me kueso. Mena. Nanga nangimik guang magoso, bare nanga nangamang motam mu tom suen biya iru aratuwoso. ^{▼▼2 Cor 4:16 Nangamang motam iru aratuwoso: Col 3:10.} 17 Ikup gotektek nangimik te aratoso mu tom tukunangta ko. Bare ko nunguning udagi te mu, ana Kaem ko nikim biya mu te ilak tom suen biya te baganakko, se nikim mu ikup ana gisan mu ninguru kiaram. Buta se anananga namatam mu mel aitak ariwasan mu me arigisan. Ana mel aitak me ariwasan wore ko la diram ko namatam bitawasan. Mu awuk, mel aitak ariwasan imi mu tom tukunangta ko. Bare mel aitakta me ariwasan mu tom suen biya ko. ^{▼▼2 Cor 4:17-18 Aitak se tom udari te: Rom 8:18; 1 Cor 2:3; Heb 11:1.}

18